游赏塞尔维亚之旅middot叁

遇见诺维萨德的夜

离开MokraGora，伲下一站本来想去塞尔维亚搭波黑国界浪个一个小镇巴伊纳巴什塔，搿搭有一个打卡胜地：水里个小木屋。

错过了的水中小木屋

勒海MokraGora路边个汽车站等仔半日天也朆看见一部车子开过，还好碰着一个热心个当地老伯伯，重复仔几遍乌日策，伲赛过看见仔救命菩萨一样上仔车。

荒无人烟的MokraGora公路

一路平稳，开到仔乌日策个汽车站，总算看见仔点现代化个样子哉。村窠窠里漂亮是漂亮，实在是要啥无啥。

但不过该歇个温度是一路下跌，到乌日策个辰光还飘起仔雨。伲妹子只带仔大热天个衣裳，实梗冷个天真家伙，有点吃弗消。

冻到变色的少女

最后伲想仔亦想，还是取消仔巴伊纳巴什塔个行程，改买仔回归现代社会个车票，往诺维萨德出发。

诺维萨德勒海贝尔格莱德个北面，是塞尔维亚第二大城市，有“塞尔维亚个雅典”之称。

多瑙河畔的诺维萨德

一路从山里出来，明显觉得温度勒海上升，等到仔诺维萨德下车个辰光，总算又有仔回归热天个感觉哉。

据说诺维萨德是由四百年前，从哈布斯堡王朝个军事战略要地彼得罗瓦拉丁要塞穿越多瑙河而来个商人建成个。

瓦拉丁要塞

之前个游记里也讲过，因为塞尔维亚是一个饱经战乱个国家，各大城里最多还是军事要塞，彼得罗瓦拉丁要塞就是伲该趟个目的地。

要去彼得罗瓦拉丁要塞，就要穿过多瑙河。诺维萨德勒海贝尔格莱德个上游，河面来得个宽阔深邃，河浪横跨仔弗少新建个大桥。

仅剩桥墩诉说历史

弗管是悬索桥还是斜拉桥，侪是近廿年重修个，因为99年个科索沃战争，原来个老桥全部侪炸无不哉。

最漂亮个一顶桥就是瓦拉丁桥哉，桥身一片蔚蓝，桥栏杆浪还挂仔弗少同心锁，作兴侪是情侣们个杰作。

蔚蓝桥身上的同心锁

穿过瓦拉丁桥，沿仔路边个指示牌，从一条小路拾步而上，就能进入仔瓦拉丁要塞。

夕阳下头个瓦拉丁要塞周身红砖侪泛仔光，高大个城墙勒海杂草个交映里露出斑斑驳驳个痕迹。有牙牙学语个小囡追逐自家屋里个狗，也有骑仔脚踏车个小倌从身边飞驰而过。从俚笃面孔浪，已经看弗见战争个阴霾哉。

夕阳下的瓦拉丁

瓦拉丁要塞里有弗少小型博物馆，记录仔该个城市个历史。但不过伲去得弗巧，辰光有点晏，侪关门哉。

实勒，伲就寻仔一个位置绝佳个餐厅，点仔伲个第n份牛排，等太阳落山。

选择这家餐馆的原因如上

三百软吃撑两个人

塞尔维亚的牛排真的好吃

勒诺维萨德，伲看见仔最漂亮个城市天际线。

诺维萨德的天际线

伲住个酒店勒海一个小巷里，边浪是彻夜个酒吧，但不过倒也弗吵。第二日起来再发现，其实骨仔，该搭就是城市个中心广场，边浪搿个色彩斑斓个尖顶房子，就是诺维萨德个主教堂。

诺维萨德主教堂

伲勒诺维萨德个日脚是悠笃笃个过个，城市漫步，走得吃力仔就搭当地人一样，坐下来吃杯咖啡。

洋泾浜的中文菜单

下午茶：桃子味的冰淇淋

教堂个钟声搭小倌个笑声让城市变得逾加安闲，但不过一个大型两手市场，也让伲看见仔该个城市个另外一面。

巨大的二手市场

伤痛已经远离，而生活还弗能忘记。

离开诺维萨德就要回国哉，本来想买大巴个，因为班次比较多。朆壳张走错仔一个买票窗口，买仔张火车票，乃也就将错就错哉。

匈牙利来的彩色火车

勒海月台等车子个辰光，伲还看见仔一部五颜六色个火车，当地人告诉伲，该个是从匈牙利开过来个火车，要过夜个。有弗少塞尔维亚人选择去匈牙利寻工作，因为匈牙利个待遇更加好，而俚笃就往来于该个火车浪个常客。

据说，中国搭两国修个匈塞铁路要修好快哉，到辰光，往返个路程会得大大缩短。

我们的城际火车

火车开仔一个多小时就到贝尔格莱德哉，伲倒朆想着会实梗快。后首来一查再晓得，诺维萨德距离贝尔格莱德不过70几公里，还无不苏州到上海搿点路程。

到离别个辰光哉……

再会

诺维萨德

再会

塞尔维亚

文

予安

版

予安

部分图片来自网络

往期导读

MokraGora

贝尔格莱德

漂洋过海一唢呐

大雪天艳阳照

水果缤纷

古巴古巴

转载请注明：http://www.hedasoft.net/kjzf/11544.html